ZINEMA ILEGALEKO 121. SAIOA

Daniel Alegretek proposatutako Take One filmaren proiekzioa (Wakefield Poole, AEB, 1977), eta, ondoren, solasaldia.

Take One “docufantasy” bat da, 1970eko hamarkadaren amaierako San Frantziskon kokatua. Poolek hainbat gizon gay gonbidatu zituen beren fantasiak kameraren aurrean kontatzera, eta, gero, filmazio-prozesuan eraikitako eszenetan antzeztera.

Filma dokumentalaren, fikzioaren eta esperimentuaren artean dago. Desiraren, kontakizunaren eta irudiaren arteko itzulpen-gailu bihurtzen du zinema. Imajinatzen, esaten eta filmatzen dena sekula ez da guztiz bat etortzen, eta desfase horretan datza filmaren indarra.

Zuzendariaren apartamentua etxeko set baten gisakoa da, bertan gauzatzen baitira fantasiak. San Frantzisko hiriak eta bere zinemek, berriz, pornoaren dimentsio kolektiboa egituratzen dute, esperientzia partekatu gisa. Bi espazioen artean, jarraitutasun bat zabaltzen da film osoan intimoaren eta publikoaren artean.

Azken finean, Take One hausnarketa metazinematografiko bat da, azaltzen baitu zinemak, desira irudikatzeaz gain, hura ekoizten, antolatzen eta irudi bihurturik itzultzen duela.

Daniel Alegrete (Madril, 1993) FilmFactory (Sarajevo), MasterLAV eta Elías Querejeta Zine Eskolan prestatutako zinemagile bat da. 2021etik Bilbon bizi da. Hor garatu zuen Fuera de campo programazio-proiektua, eta Lapislázuli Films ekoizpen etxea sortu du. Bere lanean, queer-a eta izua aztertzen ditu, eta PROYECTOR, DOC Buenos Aires eta beste zinemaldi eta espazio batzuetan egon da.