UDAKO TRINKOA. 3. SAIOA: LIRYC DELA CRUZ

Uztailaren 3an, 17:00etan, Erromako Espainiako Akademian.

In Qualche Luogo Lontano: Roma (In Some Far Place: Roma) udako hirugarren saio trinkoan, Liryc Dela Cruzek On Endings eta The Search for the Memories of the Beginning – Ang Paghahanap sa Alaala ng Simula aurkeztuko ditu.

In Qualche Luogo Lontano: Roma da Space is The Place/The Place is Space barruan Erroman egiten den programaren izenburua. Bulegoa z/b-k abiarazitako ikerketa-proiektu honen helburua da artea praktika kritiko gisa aztertzea, tresnak eskaintzen baititu gelditzeko, begiratzeko eta munduan kokatzeko, baita egoerak sortu, bizitzeko moduak irudikatu eta espazioa sortzeko. Aldizkako topaketen bidez egituratuta, hainbat forma hartzen ditu, hala nola aurkezpenak, irakurketa-saioak, ibilaldiak, lurraldearen gaineko ekintzak eta hainbat arte-ekoizpen.

ON ENDINGS eta THE SEARCH FOR THE MEMORIES OF THE BEGINNING – ANG PAGHAHANAP SA ALAALA NG SIMULA. LIRYC DELA CRUZEN BI FILM 

ON ENDINGS (Italia, Filipinak. 2020, 82 min)
Hiri abandonatu baten eta etxebizitza batzuen malenkoniaz blaitutako zuri-beltzeko planoak, non denbora luzatzen den eta barne-gogoeta eta behaketarako espazio bat sortzen den. Zinegileak bakartzetik egiten duen adierazpen intimoa da; bitartean semea faltan botatzen duen ama baten gutunak irakurtzen ditu; lau urte dira ez duela ikusi. Samurtasunez, minez eta sinesmen erlijiosoz betetako hitzek nahasten dituzte iraganeko oroitzapenak eta etorkizunean elkarrekin igaroko dituzten uneen fedea. Ahopean ahoskatutako testuetan, argia eta iluntasuna kontrastatzen dira, argi-ilunez beteriko plano xarmagarrietan bezala. Argumenturik, elkarrizketarik eta tentsiorik gabe, filma eskaintzen da ikusleak lasai ikusteko moduan.

ANG PAGHAHANAP SA ALAALA NG SIMULA (THE SEARCH FOR THE MEMORIES OF THE BEGINNING) (Filipinak, 2016))
1521ean, Espainiak Filipinak kolonizatu zituen. Kolonizazioak ia 300 urteko sufrimendua, suntsipena eta mina eragin zituen, gaur egun arte durundi egiten dutenak. Hasierako oroitzapenen bilaketa amesgaizto baten barruko amets bat da, Filipinetako kolonizazio espainiarraren urte ilunetan galdutako filipinarren identitatearen oroitzapen eta zatien historiaren etengabeko bilaketaren azterketa. Film honek zalantzan jartzen du, halaber, Espainiako eta Filipinetako historien intersekzioak gaur egun duen balioa eta nola egiten diogun aurre.

Liryc Dela Cruz (1992). Tupiko zinemagilea eta artista (South Cotabato, Mindanao, Filipinak); gaur egun Erroman (Italia) bizi da. Bere lanak nazioarteko hainbat zinemalditan aukeratu eta proiektatu dira: Locarno, Berlinale, New York, Taiwan. Filmen gaiak lotura du bere jatorriarekin, historiarekin eta psikologia pertsonalarekin. Lav Diaz filipinar zinemagile independentearen kolaboratzailea eta Apichatpong Weerasethakulen ikaslea izan da. 2020an Berlinale Talents-eko zinemagile gazte berrien artean aukeratu zuten Berlingo Nazioarteko 70. Zinemaldian. Gaur egun, Dela Cruz Teatro di Romak hautatu du 2020-2021erako INFRA proiektuan parte hartzeko. Artissima eta Torino Social Impact Art Award 2020ko saria ere jaso du, Il Mio Filippino: To Those Who Care To Feel proiektuarekin. Filipinetako etxeko langileek Italian eta beste lurralde batzuetan duten ikusezintasuna du ardatz proiektuak. Duela gutxi, Pariseko (Frantzia) Cité internationale des arts erakundeak Dela Cruz eta Il Mio Filippino proiektua aukeratu ditu 2022ko egonaldien programarako.

In qualche luogo lontano: Roma 2020-2021 ikasturterako Arte, Hezkuntza eta Kulturako MAEC-AECID beken esparruan egindako proiektua da, Erromako Espainiako Errege Akademiarako beka-programaren barrukoa.