JULIA MARTOS: JULIA ROBERTS DOESN’T EXIST

Julia Martosen aurkezpena, Bulegoa z/b-ko egonaldiaren hasieran, gonbidapen bidezko egonaldiaren modalitatean.

JULIA ROBERTS DOESN’T EXIST

Julia Roberts doesn’t exist proiektuak saioak egiten ditu ahots berri batekin Daryle, Daysie, Shelby, Rachel, Hilary, Darby, Laura, Sabrina, Grace, Julianne, Anna eta Maggie-rentzat. Julia Roberts aktoreak 1990eko hamarkadan antzeztu zituen jatorrizko gidoiak transkribatuz, desitxuratuz eta berreginez, proiektuak arakatzen du nola jabetu zen Hollywood emakumeen sentsualitatearen imajinarioaz eta desioaren ideia baten eraikuntzan izan duen eragina.

My father is dead. Then, why is he back? (Flatliners, Joel Schumacher, 1990).

Bulegoa z/b-ko egonaldia aukera bat da konpilazio-zinema praktikatzeko, nik kritika filmiko feminista egiteko metodologia gisa ulertzen dudana. 2017az geroztik Julia Robertsen filmak ikusten emandako orduei gehitu dizkiet jatorrizko gidoiak transkribatzen eta aztertzen eman ditudan orduak. 1988tik 1999ra bitartean egindako filmetan aktoreak egindako adierazpenak soilik erabiliz, ikus-entzunezko autonomia-espazio bat eratu nahi dut, bertatik antzezleak berak hausnar dezan urteetan antzeztu zuen rolari buruz.

Mendebaldeko gidoi androzentristen suntsiketan eta berridazketan, badago asmo bat zalantzan jartzeko hala historiaren narratiba ofiziala nola bera legitimatu duen bitartekoa. Ikus-entzunezkoen apropiazionismoa tresna artistiko-politiko gisa erabiltzean, berariaz azpimarratzen ditut aitaren diskurtso hegemonikotik kanpo dauden seinale, sintoma eta diskurtso txikiagoen artxipelago oso hori berreskuratzera bideratutako praktika feministekin batera egiten diren aletze- eta birziklatze-prozesuak.

Bulegoa z/b-k bideoinstalazio honen entsegua hartuko du, eta horrez gain argitalpen bat aterako da, prozesuaren eranskin gisa.

Julia Martos (Kordoba, 1989) artista bisuala eta programatzailea da. 2021ean amaitu zuen Zinema Programazio eta Komisariotzari buruzko prestakuntza Birkbeck College-n (Londres), Komisariotza eta Museoen Kudeaketako Botín Fundazioaren beka bati esker. Bere azken tesiak, The Hand Behind: a contemporary awakening of women from the Spanish family archive izenekoak, agerian jartzen du interesa duela kontra-historia feminista bat taxutzeko, apropiazio-praktika filmikoen bidez. Bere lana AEB, Europa eta Latinoamerikako jaialdietan erakutsi da, baita testuinguru nazionaletan ere, hala nola Loop Festival Barcelona (2020), Festival Bendita Tú (2020), Antic Teatre Barcelona (2018) eta C3A Córdoba-n (2017). Programatzaile gisa, Essay Film Festival jaialdian (Londres, 2021), Archivos Vivos jardunaldietan (BilbaoArte, 2021), KCCUK-eko Korean Film Nights-en (Londres, 2020) eta CCCBko Archivo Xcèntric-en (Bartzelona, 2021) parte hartu du.

Ekitaldi honek New Yorkeko Foundation for Arts Initiatives (FFAI) erakundearen babesa du.